BREAKING NEWS

NEWS UPDATED രാജ്യത്തെ 2500 നഗരങ്ങളില്‍ സൗജന്യമായി വൈ-ഫൈ ലഭ്യമാക്കുമെന്ന് കേന്ദ്രം... ഇന്റര്‍നെറ്റ് ഉപയോഗത്തില്‍ ഇന്ത്യ അമേരിക്കയെ കടത്തിവെട്ടി രണ്ടാം സ്ഥാനത്തെത്തുമെന്ന് പഠനം. ..... ഫിലെ ലാന്‍ഡര്‍ വാൽനക്ഷത്രത്തിൽ തൊട്ടു...യുട്യൂബിന് വെല്ലുവിളിയായി സാംസംഗിന്റെ ‘മില്‍ക്ക്’ ആപ്പ്.........

Flash

Saturday, 24 August 2013

ആസാദ് സ്‌കോളര്‍ഷിപ്പിന് അപേക്ഷിക്കാം


ന്യൂനപക്ഷവിഭാഗങ്ങളിലെ പെണ്‍കുട്ടികള്‍ക്കായി മൗലാനാ ആസാദ് ഫൗണ്ടേഷന്‍ ഏര്‍പ്പെടുത്തിയിരിക്കുന്ന സ്‌കോളര്‍ഷിപ്പിന് അപേക്ഷിക്കാന്‍ സമയമായി. അവസാന തീയതി സെപ്റ്റംബര്‍ 30.
കുറഞ്ഞത് 55% മാര്‍ക്കോടെ ഈ വര്‍ഷം പത്താം ക്ലാസ് വിജയിച്ച് പ്ലസ് വണ്ണിന് പ്രവേശനം നേടിയവര്‍ക്ക് അപേക്ഷിക്കാം. കുടുംബത്തിന്റെ വാര്‍ഷിക വരുമാനം ഒരു ലക്ഷം രൂപയില്‍ കവിയാന്‍ പാടില്ല. മറ്റു സ്‌കോളര്‍ഷിപ്പുകള്‍ കിട്ടിക്കൊണ്ടിരിക്കുന്നവര്‍ക്ക് ഈ സ്‌കോളര്‍ഷിപ്പിന് അര്‍ഹതയുണ്ടായിരിക്കില്ല.
12000 രൂപയാണ് സ്‌കോളര്‍ഷിപ്പ് തുക. 6000 രൂപവീതം രണ്ടു ഗഡുക്കളായിട്ടാണ് ഈ തുക ലഭിക്കുക. ആദ്യ ഗഡു സളകോളര്‍ഷിപ്പ് അനുവദിക്കുന്ന ഘട്ടത്തിലും രണ്ടാം ഗഡു പ്ലസ് വണ്‍ പരീക്ഷ വിജയിച്ച ശേഷവും ലഭിക്കും.
വിവരങ്ങള്‍ക്ക് വെബ്‌സൈറ്റ് കാണുക: http:/maef.nic.in

Wednesday, 21 August 2013

രാജ്യത്തെ ആദ്യ വ്യോമയാന യൂണിവേഴ്‌സിറ്റി് രാജീവ് ഗാന്ധിയുടെ നാമത്തില്‍


ആദ്യം ഇന്ത്യന്‍ എയര്‍ലൈന്‍സ് പൈലറ്റും പിന്നെ ഇന്ത്യയുടെ തന്നെ പൈലറ്റുമായിരുന്ന അന്തരിച്ച മുന്‍ പ്രധാനമന്ത്രി രാജീവ് ഗാന്ധിയുടെ പേരില്‍ വ്യോമയാന സര്‍വകലാശാല വരുന്നു. രാജ്യത്തെ ഇത്തരത്തിലുള്ള ആദ്യത്തെ സര്‍വകലാശാലയാണ് ഉത്തര്‍പ്രദേശില്‍ സോണിയ ഗാന്ധിയുടെ പാര്‍ലമെന്റ് മണ്ഡലമായ റായ് ബറേലിയില്‍ ആരംഭിക്കാന്‍ ഒരുങ്ങുന്നത്.
ഇതു സംബന്ധിച്ച 'ദ രാജീവ് ഗാന്ധി നാഷണല്‍ ഏവിയേഷന്‍ യൂണിവേഴ്‌സിറ്റി ബില്‍ 2013' അടുത്തയിടെ രാജീവ് ഗാന്ധിയുടെ 69-ാം ജന്മവാര്‍ഷികത്തോടനുബന്ധിച്ച് ലോക്‌സഭയില്‍ അവതരിപ്പിച്ചു. കേന്ദ്രമന്ത്രി കെ. സി. വേണുഗോപാലാണ് ബില്ലവതരിപ്പിച്ചത്. ഇതുപ്രകാരം റായ് ബറേലിയിലെ ഫര്‍സാത്ഗഞ്ജ് എന്ന സ്ഥലത്തുള്ള ഇന്ദിരാഗാന്ധി രാഷ്ട്രീയ ഉടാന്‍ അക്കാദമിയോടനുബന്ധിച്ചുള്ള 26 ഏക്കര്‍ സ്ഥലത്താണ് സര്‍വകലാശാല ഉയരുക.


വിമാന പൈലറ്റുകളെയും എയര്‍ ക്രാഫ്റ്റ് എന്‍ജിനീയര്‍മരേയും കാബിന്‍ ക്രൂവിനേയും മറ്റും പരിശീലിപ്പിക്കുന്ന അത്യാധുനിക സംവിധാനങ്ങളുള്ള ഒന്നായിരിക്കും ഈ സര്‍വകലാശാല.
രാജീവ് ഗാന്ധി പൈലറ്റായിരുന്നപ്പോള്‍
രാജീവ് ഗാന്ധിയും സോണിയ ഗാന്ധിയും
മക്കളായ രാഹുല്‍ പ്രിയങ്ക എന്നിവരോടൊപ്പം
(ഒരു പഴയകാല ചിത്രം)

Tuesday, 20 August 2013

കൊതുകുകള്‍ക്കും ഒരു ദിവസം!


എല്ലാവരും കൊതുകുദിനം ആചരിച്ചുവോ? അഥവാ അങ്ങനൊയൊരു ദിനാചരണം ഉള്ളതായി അറിയുമോ? എങ്കില്‍ നമ്മളെല്ലാം ശല്ല്യക്കാരായി മാത്രം കണുന്ന കൊതുകുകള്‍ക്കായി ഒരു ദിവസമുണ്ട്... ആഗസ്റ്റ് 20.
എല്ലാ വര്‍ഷവും ആഗസ്റ്റ് 20 കൊതുകുദിനമായി ആചരിക്കപ്പെടുന്നു. പെണ്‍ കൊതുകുകളാണ് മനുഷ്യര്‍ക്കിടയില്‍ മലേറിയ പടര്‍ത്തുന്നതെന്ന് തിരിച്ചറിഞ്ഞ ബ്രിട്ടീഷ് ഡോക്ടര്‍ സര്‍. റൊണാള്‍ഡ് റോസിന്റെ കണ്ടെത്തലിന്റെ ഓര്‍മ്മയ്ക്കായാണ് ഈ ദിനാചരണം. 1897ലാണ് റോസ് ഈ സുപ്രധാന കണ്ടെത്തല്‍ നടത്തിയത്. ഇതിന് 1902ല്‍ മെഡിസിനുള്ള നോബല്‍ പുരസ്‌ക്കാരവും അദ്ദേഹത്തിന് ലഭിച്ചു. തന്റെ കണ്ടെത്തല്‍ വെളിപ്പെടുത്തിയതിന് തൊട്ടുപിന്നാലെ ഭാവിയില്‍ ഇത്തരമൊരു ദിനാചരണത്തേപ്പറ്റിയും റോസ് പറഞ്ഞുവച്ചു.


ശരിക്കും പറഞ്ഞാല്‍ നാം ഭാരതീയര്‍ക്ക് റോസിന്റെ നേട്ടത്തില്‍ പങ്കുണ്ട്. റൊണാള്‍ഡ് റോസ് ജനിച്ചതുതന്നെ ഇന്ത്യയിലാണ്. ഇന്ത്യയില്‍ ജോലി ചെയ്തിരുന്ന ബ്രിട്ടീഷ് ആര്‍മി ജനറലായിരുന്ന സര്‍ കാംപ്‌ബെല്‍ ക്ലേ ഗ്രാന്റ് റോസിന്റേയും മറ്റില്‍ഡ ചാര്‍ലോട്ടി എല്‍ഡര്‍ട്ടണിന്റേയും പുത്രനായിട്ടായിരുന്നു ജനനം. കല്‍ക്കട്ട പ്രസിഡന്‍സി ജനറല്‍ ഹോസ്പിറ്റലിലായിരുന്നു അദ്ദേഹം ജോലി ചെയ്തിരുന്ന കാലഘട്ടത്തിലാണ് റോസ,് മലേറിയയെക്കുറിച്ച് പഠനഗവേഷണങ്ങള്‍ ആരംഭിച്ചത്. 1882 ല്‍ ആരംഭിച്ച പഠനങ്ങള്‍ പിന്നീട് പല സ്ഥലങ്ങളിലേയ്ക്കും ട്രാന്‍സ്ഫര്‍ ആയി പോയപ്പോഴും തുടര്‍ന്നു. ഒടുവില്‍ സെക്കന്ധരാബാദിലെ ഒസ്മാനിയ യൂണിവേഴ്‌സിറ്റി മെഡിക്കല്‍ സ്‌കൂളിലേക്ക് അദ്ദേഹം എത്തി. അവിടെവച്ചാണ് അദ്ദേഹം തന്റെ സുപ്രധാന കണ്ടെത്തല്‍ നടത്തിയത്.


ബെഗുംപേത് എയര്‍പോര്‍ട്ടിനു സമീപം സെക്കന്ധരാബാദില്‍ അദ്ദേഹം താമസിച്ച് പരീക്ഷണങ്ങള്‍ നടത്തുകയും മലേറിയ പാരസൈറ്റിനെ കണ്ടെത്തുകയും ചെയ്ത കെട്ടിടം ഇന്ന് ഒരു പൈതൃകസ്മൃതിമണ്ഡപമായി നിലനിര്‍ത്തിയിരിക്കുന്നു. ഇതു കൂടാതെ രാജ്യത്തങ്ങോളമിങ്ങോളമായി നിരവധി സ്മാരകങ്ങള്‍ റോസിന്റെ നാമം പേറുന്നതായുണ്ട്. അത്തരത്തില്‍ പ്രധാനമായ ഒന്നാണ് ഹൈദരാബാദിലെ സര്‍ റൊണാള്‍ഡ് റോസ് ഇന്‍സ്റ്റിറ്റിയൂട്ട് ഓഫ് പാരസൈറ്റോളജി.
ഇനി കൊതുകടി കൊള്ളുമ്പോള്‍ ഓര്‍ക്കാന്‍ മറക്കരുത്... സ്വജീവിതം മാനവരാശിക്കായി ഉഴിഞ്ഞുവച്ച ഈ മഹാനുഭാവനെ...

Friday, 16 August 2013

നമ്മുടെ സ്വന്തം വിക്രാന്ത്‌

'വിക്രാന്ത്' എന്ന പദത്തിന് 'ധീരനായ യോദ്ധാവ്', 'വീരന്‍' എന്നെല്ലാമാണ് അര്‍ത്ഥം. ഇന്ത്യന്‍ സേനയ്ക്ക് കരുത്തു പകരുന്ന ധീരനായ യോദ്ധാവുതന്നെയാണ് വിക്രാന്ത്. ഇന്ത്യ സ്വന്തമായി നിര്‍മ്മിച്ച ആദ്യ വിമാന വാഹിനിക്കപ്പല്‍.

ഇത് വിക്രാന്തിന്റെ രണ്ടാം അവതാരമാണ്. 1961ല്‍ ബ്രിട്ടീഷ്‌സേനയില്‍നിന്നും ഇന്ത്യ സ്വന്തമാക്കിയ ആദ്യ വിമാന വാഹിനിക്കപ്പല്‍. ഐ. എന്‍. എസ്. വിക്രാന്ത് 1997ലാണ് ഡി കമ്മീഷന്‍ ചെയ്തത്. അറുപതുകളുടെ മധ്യത്തിലുണ്ടായ ഇന്ത്യ-പാക് യുദ്ധത്തിലും അഞ്ചുവര്‍ഷം കഴിഞ്ഞുണ്ടായ ബംഗ്ലാദേശിന്റെ പിറവിക്കു കാരണമായ യുദ്ധത്തിലും നമ്മുടെ സേനയെ വിജയത്തിലേക്ക് നയിച്ച വിക്രാന്തിന്റെ പിന്‍ഗാമിയാണ് പുതിയ നമ്മുടെ സ്വന്തം വിക്രാന്ത്.
വാണിജ്യകപ്പല്‍ മാത്രം നിര്‍മ്മിച്ചു വന്ന കൊച്ചി കപ്പല്‍ശാലയുടെ വളര്‍ച്ചയില്‍ മറ്റൊരു പൊന്‍തൂവലായ പുതിയ വിക്രാന്ത് വിമാനവാഹിനികളുടെ രൂപകല്പനയിലും നിര്‍മ്മാണത്തിലും സ്വാശ്രയത്വം നേടിയ ലോകത്തെ അഞ്ചാമത്തെ രാജ്യമെന്ന പദവികൂടി ഭാരതത്തിന് നേടിത്തന്നു. അമേരിക്ക, റഷ്യ, ഫ്രാന്‍സ്, ബ്രിട്ടന്‍ എന്നിവയാണ് മറ്റു രാജ്യങ്ങള്‍.
അതില്‍തന്നെ 40,000 ടണ്‍ കേവു ഭാരമുള്ള വിമാനവാഹിനിക്കപ്പല്‍ മൂന്നു വമ്പന്‍ രാജ്യങ്ങളേ ഇതുവരെ നിര്‍മ്മിച്ചിട്ടുള്ളൂ. അമേരിക്ക, ബ്രിട്ടന്‍, റഷ്യ. നാലാമതായി ആ പട്ടികയിലിടംപിടിച്ച രാജ്യം ഇന്ത്യയാണ്.

 മറ്റു രാജ്യങ്ങളുടെ അതിരു ലംഘിക്കാതെ തന്നെ സമുദ്രത്തിലെ വിമാനത്താവളമായ ഇൗ കപ്പലില്‍നിന്നും ഏതു ശത്രുവിനേയും ഏതു ലക്ഷ്യത്തേയും ആക്രമിക്കാനുള്ള കരുത്താണ് ഇതോടെ ഇന്ത്യന്‍ സേനയ്ക്ക് കൈവന്നിരിക്കുന്നത്.മുപ്പതു വിമാനങ്ങളെ ഉള്ളില്‍ക്കരുതാന്‍ വിക്രാന്തിനു കഴിയും. ഒരേ സമയം രണ്ട് യുദ്ധവിമാനങ്ങള്‍ക്കു പറന്നുയരാനും ഒരെണ്ണത്തിന് തിരിച്ചിറങ്ങാനും കഴിയുന്നത്ര വിശാലമായ ഡക്ക് വിക്രാന്തിന്റെ മറ്റൊരു സവിശേഷതയാണ്. 260 മീറ്റര്‍ നീളവും 60 മീറ്റര്‍ വീതിയുമുള്ള ഇൗ വിമാനവാഹിനിയില്‍ രണ്ടായിരത്തിലേറെ നാവികര്‍ക്കു കഴിയാനുള്ള എല്ലാവിധ സൗകര്യങ്ങളുമുണ്ട്. ഇതുവരെയുള്ള നിര്‍മ്മാണജോലികള്‍ പൂര്‍ത്തിയാകാന്‍ ഒന്‍പത് വര്‍ഷമാണെടുത്തത്. രണ്ടായിരത്തിപതിനെട്ടോടെ പൂര്‍ണ്ണമായും യുദ്ധത്തിന് സജ്ജമാകും.
വിക്രാന്തിന്റെ വരവോടെ ഇന്ത്യന്‍ നാവികസേനയുടെ വിമാനവാഹിനിക്കപ്പലുകളുടെ എണ്ണം മൂന്നാകും. ഇപ്പോഴുള്ള ഐ. എന്‍. എസ് വിരാട്, റഷ്യയില്‍നിന്നു വാങ്ങിയ ഗോര്‍ഷ്‌കോവ് എന്നിവയാണ് മറ്റു രണ്ടെണ്ണം. ഇന്ത്യന്‍ നാവികസേനയുടെ അരാഹത്ത് എന്ന ആണവ മുങ്ങിക്കപ്പലിന്റെ ആണവ റീയാക്ടര്‍ പ്രവര്‍ത്തനക്ഷമമായത് 2013 ആഗസ്റ്റ് 10നാണ്. ഇതോടെ ന്യൂക്ലിയര്‍ മുങ്ങിക്കപ്പല്‍ക്ലബില്‍ (അമേരിക്ക, റഷ്യ, ബ്രിട്ടന്‍, ഫ്രാന്‍സ്, ചൈന) ഇന്ത്യ അംഗമായതിന് തൊട്ടുപിന്നാലെയാണ് വിക്രാന്തിന്റെ വരവ്.

പ്രതിരോധ സംവിധാനങ്ങള്‍ പരമാവധി വര്‍ധിപ്പിക്കേണ്ട നിലയിലാണ് നമ്മുടെ അയല്‍ബന്ധങ്ങളെന്നതിനാല്‍ ഇൗ രംഗത്തെ ഏത് നേട്ടവും ഇന്ത്യയിലെ ജനങ്ങള്‍ സഹര്‍ഷം സ്വാഗതം ചെയ്യും.

കമാന്‍ഡര്‍ അഭിലാഷ് ടോമിക്ക് കീര്‍ത്തിചക്ര

ഒരു പായ്ക്കപ്പലില്‍ ഒറ്റയ്ക്ക് ലോകം ചുറ്റി ചരിത്രം കുറിച്ച മലയാളിയായ നേവി ഓഫീസര്‍, കമാന്‍ഡര്‍ അഭിലാഷ് ടോമിക്ക് ഉന്നതമായ സേനാമെഡല്‍ കീര്‍ത്തിചക്ര.











ത്രിപ്പൂണിത്തുറ കണ്ടനാട് വലിയവറ വീട്ടില്‍ ലഫ്. കേണല്‍ (റിട്ട.) വി. സി. ടോമിയുടെയും വല്‍സമ്മയുടെയും പുത്രനായ കമാന്‍ഡര്‍ ടോമി 2012 നവംബര്‍ 1ന് കേരളപ്പിറവി ദിനത്തിലാണ് തന്റെ സാഹസിക യാത്രയ്ക്കിറങ്ങിയത്. 'മാതേയി' എന്നു പേരിട്ട പായ്ക്കപ്പലില്‍ ഒറ്റയ്ക്ക് ഒരു കരയിലും ഇറങ്ങാതെ 150 ദിവസങ്ങള്‍കൊണ്ട് നിരവധി പ്രതികൂലഘടകങ്ങളെ നേരിട്ട് അഭിലാഷ് ടോമി കടല്‍ കീഴടക്കുകയായിരുന്നു. 2013 മാര്‍ച്ച് 31നാണ് യാത്ര പൂര്‍ത്തിയാക്കി അഭിലാഷ് മുംബൈയില്‍ എത്തിച്ചേര്‍ന്നത്.




കമാന്‍ഡര്‍ അഭിലാഷ് ടോമിയെ രാഷ്ട്രപതി സ്വീകരിച്ചപ്പോള്‍...
അഭിലാഷ് ടോമി മാദേയി എന്ന പായ്ക്കപ്പലില്‍
ഇതോടെ ഈ നേട്ടം കൈവരിക്കുന്ന ആദ്യ ഇന്ത്യക്കാരനും രണ്ടാമത്തെ ഏഷ്യക്കാരനുമായി കമാന്‍ഡര്‍ അഭിലാഷ്. ഇന്ത്യന്‍ നേവി ഓഫീസറായിരുന്ന കമാന്‍ഡര്‍ ദിലിപ് ഡോന്‍ഡേയാണ് ഇത്തരത്തില്‍ പായ്ക്കപ്പലില്‍ ഒറ്റയ്ക്ക് ലോകം ചുറ്റിയ ആദ്യ ഇന്ത്യക്കാരന്‍. പക്ഷേ അദ്ദേഹം യാത്രയ്ക്കിടെ നാല് തവണ കരയ്ക്ക് കയറിയിരുന്നു.
കമാന്‍ഡര്‍ ദിലിപ് ഡോന്‍ഡേ


യുദ്ധേതരരംഗത്തെ ധീരതയ്ക്കും സ്വയം സമര്‍പ്പണത്തിനും നല്‍കുന്ന ഏറ്റവും വലിയ രണ്ടാമത്തെ ഇന്ത്യന്‍ മിലിറ്ററി ബഹുമതിയാണ് കീര്‍ത്തിചക്ര.

1952 ജനുവരി 4നാണ് ഈ മെഡല്‍ ഏര്‍പ്പെടുത്തിയത്. 1947 ഓഗസ്റ്റ് 15 മുതല്‍ മുന്‍കാല പ്രാബല്യത്തോടെയായിരുന്നു ഇത്. 'അശോക ചക്ര ക്ലാസ് II' എന്നായിരുന്നു ഈ മെഡല്‍ ആദ്യകാലത്തറിയപ്പെട്ടിരുന്നത്. 1967 ജനുവരി 27ന് പുനര്‍ നാമകരണം ചെയ്യപ്പെട്ട് 'കീര്‍ത്തിചക്ര' യായി. വൃത്താകൃതിയുള്ള വെള്ളി മെഡലാണിത്. 1-3/8 ഇഞ്ച് വ്യാസം. മധ്യത്തില്‍ അശോകചക്രം. ഇതിനുചുറ്റും താമരപ്പുമൊട്ടുകള്‍കൊണ്ടൊരു പുഷ്പചക്രവുമുണ്ട്.

ലോകം ചുറ്റിവന്ന കമാന്‍ഡര്‍ അഭിലാഷ് ടോമിയുടെ സാഹസിക യാത്രയുടെ 
ദൃശ്യങ്ങള്‍ കാണൂ...

Top News

Labour India