ചൊവ്വയിലേക്ക് പോകാന്‍ 20,000 ഇന്ത്യക്കാര്‍

''ചൊവ്വയില്‍ നടന്ന പൊതു തെരഞ്ഞെടുപ്പില്‍ മലയാളിയായ ജോസഫ് മാത്യു 5000 വോട്ടുകള്‍ക്ക് തൊട്ടടുത്ത എതിര്‍ സ്ഥാനാര്‍ത്ഥിയായ അമേരിക്കക്കാരനെ തോല്പിച്ചു...'' 
ഞെട്ടണ്ട! ഇങ്ങനെയൊരു വാര്‍ത്ത സമീപഭാവിയില്‍ കേട്ടാലും അത്ഭുതപ്പെടാനില്ല. കാരണം ചൊവ്വയിലേക്ക് ചേക്കേറാന്‍ തയാറായി പതിനായിരക്കണക്കിന് ഇന്ത്യക്കാരാണ് നില്‍ക്കുന്നത്...!

ചൊവ്വയിലുണ്ടാക്കാന്‍ ലക്ഷ്യമിടുന്ന കോളനികളുടെ മാതൃകകള്‍

ചൊവ്വാഗ്രഹത്തിലേക്ക് സ്ഥിരവാസത്തിന് പോകാന്‍ 140 രാജ്യങ്ങളില്‍നിന്നുള്ള ആകെ അപേക്ഷകര്‍ രണ്ട് ലക്ഷത്തോളമാണ്. അപേക്ഷിച്ചവരില്‍ ഇന്ത്യക്കാര്‍ 20,000. അമേരിക്കക്കാരാണ്  ഒന്നാംസ്ഥാനത്ത്  47,000 പേര്‍. 13,000 അപേക്ഷകരുമായി ചൈന മൂന്നാം സ്ഥാനത്തുണ്ട്. ഏറ്റവും പ്രധാന കാര്യം പോകുന്നവരാരും തിരിച്ചുവരുന്നവരല്ല എന്നതാണ്‌. ഈ ദൗത്യത്തില്‍ തിരിച്ചുവരവിന്റെ കാര്യം പറയുന്നേയില്ല. അതായത് പോകുന്നവര്‍ അവിടെ സ്ഥിരതാമസം ഉദ്ദേശിച്ചു തന്നെയിറങ്ങിയവരാണ്!

നെതര്‍ലന്‍ഡ്‌സുകാരനായ വ്യവസായസംരംഭകന്‍ ബാസ്  ലാന്‍സ്‌ഡ്രോപ്പാണ്  'മാര്‍സ്‌വണ്‍' എന്ന ചൊവ്വാ പദ്ധതിക്ക് പിന്നില്‍. ചൊവ്വയില്‍ സ്ഥിരവാസത്തിന് സൗകര്യമൊരുക്കുകയാണ് ലക്ഷ്യം. ഇതിനായി തുടക്കത്തില്‍വേണ്ടത് 600 കോടി ഡോളറാണ് (ഏതാണ്ട്‌  38,598 കോടി രൂപ). ദൗത്യത്തിന്റെ ടെലിവിഷന്‍ സംപ്രേഷണത്തിലൂടെയും മറ്റും പണം കണ്ടെത്താനാകുമെന്നാണ് പദ്ധതി നടത്തിപ്പുകാര്‍ കരുതുന്നത്. 1999-ല്‍ ഊര്‍ജതന്ത്രനൊബേല്‍ നേടിയ നെതര്‍ലന്‍ഡ്‌സുകാരന്‍ ജെറാര്‍ഡ് ഹൂഫ്റ്റ് പദ്ധതിയോട് സഹകരിക്കുന്നുണ്ട്.

2023-ഓടെ നാലംഗങ്ങള്‍ വീതമുള്ള 10 ടീമുകളെ ചൊവ്വയിലെത്തിക്കുകയാണ്  ആദ്യ
ലക്ഷ്യം. 2015-ല്‍ ഇതിന്റെ തീവ്രപരിശീലനങ്ങള്‍ക്ക് തുടക്കമാകും.
ചൊവ്വയിലേക്കുള്ള യാത്രതന്നെ ഏഴുമാസത്തോളമെടുക്കും. -55 ഡിഗ്രി താപനില അടക്കം
അവിടത്തെ കഠിന സാഹചര്യങ്ങളെ മനുഷ്യന്‍ എങ്ങനെ അതിജീവിക്കും എന്നതും പ്രശ്‌നമാണ്. മരുഭൂമിയിലേതുപോലുള്ള അന്തരീക്ഷത്തില്‍ അടങ്ങിയിരിക്കുന്നതിലേറെയും കാര്‍ബണ്‍ ഡയോക്‌സൈഡും.
പദ്ധതിയുടെ ആദ്യപടിയായി 2016 ജനുവരിയില്‍ സോളാര്‍ പാനലുകളും സ്‌പെയര്‍ പാര്‍ട്ടുകളും മറ്റ് അവശ്യവസ്തുക്കളുമടക്കം 2500 കിലോ സാധനങ്ങളുമായി ഒരു വാഹനം ചൊവ്വയിലേക്കയക്കും. അവിടെ കോളനികള്‍ സ്ഥാപിക്കുന്നതിന്റെ ആദ്യ പടിയായ പ്രവര്‍ത്തനങ്ങള്‍ക്കാണിത്. തുടര്‍ന്ന് 2018ല്‍ അടുത്ത വാഹനം പ്രത്യേക മാര്‍സ് റോവറുകളുമായെത്തും. ഈ റോവറുകള്‍ മനുഷ്യന് താമസിക്കാന്‍ യോഗ്യമായ സ്ഥലം കണ്ടെത്തുന്നതിന് ചൊവ്വയുടെ ഉപരിതലത്തില്‍ ചുറ്റിസഞ്ചരിക്കും. 2021 ആകുമ്പോഴേക്കും ഈ റോവറുകള്‍ മനുഷ്യനെയും വഹിച്ചെത്തുന്ന പേടകങ്ങള്‍ക്ക് ലാന്‍ഡ് ചെയ്യാനുള്ള സൗകര്യങ്ങളൊരുക്കും. 2022 ഓടെ ആദ്യ വാഹനം ചൊവ്വ ലക്ഷ്യമാക്കി കുതിപ്പാരംഭിക്കും. 2023ഓടെ ഈ സംഘം ചൊവ്വ ഗ്രഹത്തിലെ ആദ്യ താമസക്കാരാകും എന്നതാണ് കണക്കുകൂട്ടല്‍. 2025ല്‍ അടുത്ത സംഘം എത്തും. ആദ്യ സംഘമെത്തി രണ്ടു വര്‍ഷത്തെ ഇടവേളയില്‍ നാല് പേരടങ്ങുന്ന സംഘങ്ങള്‍ ചൊവ്വയിലെത്തിക്കൊണ്ടിരിക്കുമെന്നര്‍ത്ഥം.
നാസ ഉള്‍പ്പെടെയുള്ള ബഹിരാകാശ ഏജന്‍സികള്‍ പദ്ധതിയെക്കുറിച്ച് സംശയങ്ങള്‍ പ്രകടിപ്പിച്ചിട്ടുണ്ട്. നാസയുടെ ആളില്ലാ പര്യവേക്ഷണ വാഹനങ്ങള്‍ ചൊവ്വയിലെത്തിയിട്ടുണ്ട്. 20 വര്‍ഷത്തിനകം മനുഷ്യനെ ചൊവ്വയിലേക്ക് അയയ്ക്കാനും നാസയ്ക്ക് പദ്ധതിയുണ്ട്‌.

ബാസ് ലാന്‍സ്‌ഡ്രോപ് 

1977 മാര്‍ച്ച് 5ന് നെതര്‍ലന്‍ഡ്‌സില്‍ ജനിച്ച ബാസ് ലാന്‍സ്‌ഡ്രോപ് 'മാര്‍സ് വണ്‍' എന്ന പ്രോജക്ടിലൂടെ അന്താരാഷ്ട്ര പ്രശസ്തിയിലേക്കുയര്‍ന്നു. നെതര്‍ലന്‍ഡ്‌സിലെ പ്രശസ്തമായ യൂണിവേഴ്‌സിറ്റി ഓഫ് ട്വന്റിയില്‍ മെക്കാനിക്കല്‍ എന്‍ജിനീയറിംഗില്‍ മാസ്റ്റര്‍ ബിരുദ കോഴ്‌സിനു പഠിക്കുന്ന കാലത്താണ് ഭ്രമാത്മകമെന്ന് തോന്നാവുന്ന ചൊവ്വ ദൗത്യത്തിന്റെ ആശയം അദ്ദേഹത്തില്‍ പൊട്ടിമുളയ്ക്കുന്നത്.

മാര്‍സ് വണ്‍ പദ്ധതി വീഡിയോ പ്രസന്റേഷന്‍ കാണൂ...

കമാന്‍ഡര്‍ അഭിലാഷ് ടോമിക്ക് കീര്‍ത്തിചക്ര

ഒരു പായ്ക്കപ്പലില്‍ ഒറ്റയ്ക്ക് ലോകം ചുറ്റി ചരിത്രം കുറിച്ച മലയാളിയായ നേവി ഓഫീസര്‍, കമാന്‍ഡര്‍ അഭിലാഷ് ടോമിക്ക് ഉന്നതമായ സേനാമെഡല്‍ കീര്‍ത്തിചക്ര.

ത്രിപ്പൂണിത്തുറ കണ്ടനാട് വലിയവറ വീട്ടില്‍ ലഫ്. കേണല്‍ (റിട്ട.) വി. സി. ടോമിയുടെയും വല്‍സമ്മയുടെയും പുത്രനായ കമാന്‍ഡര്‍ ടോമി 2012 നവംബര്‍ 1ന് കേരളപ്പിറവി ദിനത്തിലാണ് തന്റെ സാഹസിക യാത്രയ്ക്കിറങ്ങിയത്. 'മാതേയി' എന്നു പേരിട്ട പായ്ക്കപ്പലില്‍ ഒറ്റയ്ക്ക് ഒരു കരയിലും ഇറങ്ങാതെ 150 ദിവസങ്ങള്‍കൊണ്ട് നിരവധി പ്രതികൂലഘടകങ്ങളെ നേരിട്ട് അഭിലാഷ് ടോമി കടല്‍ കീഴടക്കുകയായിരുന്നു. 2013 മാര്‍ച്ച് 31നാണ് യാത്ര പൂര്‍ത്തിയാക്കി അഭിലാഷ് മുംബൈയില്‍ എത്തിച്ചേര്‍ന്നത്.

കമാന്‍ഡര്‍ അഭിലാഷ് ടോമിയെ രാഷ്ട്രപതി സ്വീകരിച്ചപ്പോള്‍...

അഭിലാഷ് ടോമി മാദേയി എന്ന പായ്ക്കപ്പലില്‍

ഇതോടെ ഈ നേട്ടം കൈവരിക്കുന്ന ആദ്യ ഇന്ത്യക്കാരനും രണ്ടാമത്തെ ഏഷ്യക്കാരനുമായി കമാന്‍ഡര്‍ അഭിലാഷ്. ഇന്ത്യന്‍ നേവി ഓഫീസറായിരുന്ന കമാന്‍ഡര്‍ ദിലിപ് ഡോന്‍ഡേയാണ് ഇത്തരത്തില്‍ പായ്ക്കപ്പലില്‍ ഒറ്റയ്ക്ക് ലോകം ചുറ്റിയ ആദ്യ ഇന്ത്യക്കാരന്‍. പക്ഷേ അദ്ദേഹം യാത്രയ്ക്കിടെ നാല് തവണ കരയ്ക്ക് കയറിയിരുന്നു.

കമാന്‍ഡര്‍ ദിലിപ് ഡോന്‍ഡേ

യുദ്ധേതരരംഗത്തെ ധീരതയ്ക്കും സ്വയം സമര്‍പ്പണത്തിനും നല്‍കുന്ന ഏറ്റവും വലിയ രണ്ടാമത്തെ ഇന്ത്യന്‍ മിലിറ്ററി ബഹുമതിയാണ് കീര്‍ത്തിചക്ര.

1952 ജനുവരി 4നാണ് ഈ മെഡല്‍ ഏര്‍പ്പെടുത്തിയത്. 1947 ഓഗസ്റ്റ് 15 മുതല്‍ മുന്‍കാല പ്രാബല്യത്തോടെയായിരുന്നു ഇത്. 'അശോക ചക്ര ക്ലാസ് II' എന്നായിരുന്നു ഈ മെഡല്‍ ആദ്യകാലത്തറിയപ്പെട്ടിരുന്നത്. 1967 ജനുവരി 27ന് പുനര്‍ നാമകരണം ചെയ്യപ്പെട്ട് 'കീര്‍ത്തിചക്ര' യായി. വൃത്താകൃതിയുള്ള വെള്ളി മെഡലാണിത്. 1-3/8 ഇഞ്ച് വ്യാസം. മധ്യത്തില്‍ അശോകചക്രം. ഇതിനുചുറ്റും താമരപ്പുമൊട്ടുകള്‍കൊണ്ടൊരു പുഷ്പചക്രവുമുണ്ട്.

ലോകം ചുറ്റിവന്ന കമാന്‍ഡര്‍ അഭിലാഷ് ടോമിയുടെ സാഹസിക യാത്രയുടെ 

ദൃശ്യങ്ങള്‍ കാണൂ...

വണ്ടര്‍ വാലന്‍ഡ!

അമേരിക്കന്‍ സാഹസികന്‍ നിക്ക് വാലന്‍ഡ വീണ്ടും ലോകത്തെ അമ്പരപ്പിച്ചു. 1500 അടി ഉയരത്തില്‍ ഗ്രാന്‍ഡ് കാന്യന്‍ ഗര്‍ത്തത്തിന് കുറുകെ കെട്ടിയ ഇരുമ്പുവടത്തില്‍ 1400 അടി ദൂരമാണ് ഇദ്ദേഹം സാഹസികമായി നടന്നു കടന്നത്! മുന്‍പ് നയാഗ്രാ വെള്ളച്ചാട്ടത്തിന് മുകളിലൂടെ ഇതുപോലെ ഇരുമ്പുവടത്തില്‍ നടന്നും നിക്ക് നമ്മെ ഞെട്ടിച്ചിട്ടുണ്ട്.

2013 ജൂണ്‍ 23നാണ് ലോകപ്രസിദ്ധമായ ഗ്രാന്‍ഡ് കാന്യന്‍ ഗര്‍ത്തത്തിനുമുകളിലൂടെ നിക്ക് നടന്നത്. താഴെ കൊളറാഡോ നദി. ചുറ്റും ശക്തിയായി വീശിയടിക്കുന്ന കാറ്റ്. ഇളകിയാടുന്ന ഉരുക്കുവടം. ഒന്നു പിഴച്ചാല്‍ 1500 അടി താഴ്ചയില്‍ വീണ് ചിതറും! എന്നാല്‍ അലറി വീഴുന്ന വന്യമായ നയാഗ്രാ വെള്ളച്ചാട്ടത്തിന്റെ കുറുകെ നടന്ന ഈ സാഹസികന് അതൊന്നും പ്രശ്‌നമായില്ല. 22 മിനിറ്റും 54 സെക്കന്‍ഡും കൊണ്ട് നിക്ക് ഗ്രാന്‍ഡ് കാന്യന്‍ കടന്നു, അതിസാഹസിക പ്രവൃത്തികളുടെ ചരിത്രത്താളുകളിലേക്ക് വിസ്മയകരമായ ഒരേടുകൂടി ചേര്‍ത്തുകൊണ്ട്.

2012 ജൂണ്‍ 15നായിരുന്നു നിക്ക് നയാഗ്രാ വെള്ളച്ചാട്ടത്തിന് കുറുകെ ഉരുക്കുവടത്തില്‍ നടന്നത്. ഇത്തരം സാഹസിക പ്രവര്‍ത്തികള്‍ക്ക് ഏഴ് ഗിന്നസ് റെക്കോഡുകള്‍ ഇദ്ദേഹത്തിന്റെ പേരിലുണ്ട്. ഇത്തരം സാഹസിക പ്രവൃത്തികള്‍ക്ക് പേരുകേട്ട കുടുബത്തില്‍നിന്നാണ് ഇദ്ദേഹത്തിന്റെ വരവ്. 'ഫ്‌ളയിംഗ് വാലന്‍ഡാസ്' എന്ന സര്‍ക്കസ് കുടുംബമാാണിവരുടേത്. നിക്കിന്റെ ഒരു മുതുമുത്തച്ഛന്‍, കാള്‍ വാലന്‍ഡ, 73-ാം വയസ്സില്‍ ഇത്തരമൊരു പ്രകടനത്തിനിടെ അപകടത്തില്‍പെട്ട് മരണമടഞ്ഞിട്ടുണ്ട്.

കയറിലൂടെ നടപ്പ് മാത്രമല്ല ഈ വിദ്വാന്റെ പണി. ഉയരത്തില്‍ കെട്ടിയ വടത്തിലൂടെ സൈക്കിളോടിച്ചും സാഹസികത തെളിയിച്ചു ഈ അത്ഭുത മനുഷ്യന്‍. ആദ്യം 2008ലും പിന്നീട് 2010ലും ഇത്തരത്തില്‍ സൈക്കിള്‍ പ്രകടനം നടത്തി. രണ്ടാമത്തെ ശ്രമത്തില്‍ 260 അടി ഉയരത്തില്‍ കെട്ടിയ ഉരുക്കു വടത്തിലൂടെ സൈക്കിള്‍ സവാരി നടത്തി സ്വന്തം ഗിന്നസ് റെക്കോഡ് തിരുത്തി. ഇതും പോരാഞ്ഞ് 2011 ജൂണ്‍ 10ന് ഹെലിക്കോപ്റ്ററില്‍ 250 അടി ഇയരത്തില്‍ കയറില്‍ കടിച്ചുപിടിച്ച് തൂങ്ങിക്കിടന്ന് സഞ്ചരിച്ചും കാഴ്ചക്കാരെ വിസ്മയിപ്പിച്ചു. അമേരിക്കയിലെ ഫ്‌ളോറിഡയിലുള്ള സരസോട്ടയില്‍ 1979 ജനുവരി 24നാണ് നിക്ക് വാലന്‍ഡ ജനിച്ചത്.