ആസ്‌തിമൂല്യം അളന്ന മൂവര്‍ സംഘത്തിന്‌ സാമ്പത്തിക നോബല്‍

സാമ്പത്തികശാസ്‌ത്രത്തിനുള്ള ഈ വര്‍ഷത്തെ നോബല്‍ പുരസ്‌ക്കാരം മൂന്ന്‌ അമേരിക്കന്‍ സാമ്പത്തിക വിദഗ്‌ധര്‍ക്ക്‌ . ഷിക്കാഗോ സര്‍വകലാശായിലെ പ്രൊഫസര്‍മാരായ യൂജിന്‍ എഫ്‌. ഫാമ, ലാര്‍സ്‌ പീറ്റര്‍ ഹാന്‍സന്‍ എന്നിവരും യേല്‍ സര്‍വകലാശാലയിലെ പ്രൊഫസറായ റോബര്‍ട്ട്‌ ജെ. ഷില്ലറുമാണ്‌ നോബല്‍ പുരസ്‌ക്കാരം പങ്കുവച്ചത്‌. 

റോബര്‍ട്ട്  ഷില്ലര്‍, ലാര്‍സ് ഹാന്‍സന്‍, യൂജിന്‍ ഫാമ എന്നിവര്‍

ആസ്‌തിമൂല്യം വിലയിരുത്താനുള്ള നൂതനവും പ്രായോഗികവുമായ രീതി വികസിപ്പിച്ചതിനാണ്‌ ഇവര്‍ സമ്മാനിതരായത്‌. ഓഹരികളുടെയും കടപ്പത്രങ്ങളുടെയും ഭാവി പ്രവചിക്കുന്നതിനും മറ്റും ഇവര്‍ മുന്നോട്ടുവച്ച രീതി കൂടുതല്‍ ഫലപ്രദമാണെന്ന്‌ നോബല്‍ സമ്മാനസമിതി പ്രഖ്യാപനത്തില്‍ പറഞ്ഞു.
നിക്ഷേപത്തിന്റെ സാമ്പത്തിക വശങ്ങളേക്കുറിച്ച്‌ ഗവേഷണത്തില്‍ ഏര്‍പ്പെട്ടിരിക്കുന്ന 74കാരനായ ഫാമ `ആധുനിക ധനകാര്യ ശാസ്‌ത്രത്തിന്റെ പിതാവ്‌ ' ("father of modern finance.") എന്നാണറിയ പ്പെടുന്നത്‌. ചിക്കാഗോ യൂണിവേഴ്‌സിറ്റിയിലെ സാമ്പത്തികശാസ്ത്രവിഭാഗത്തിലെ ഇന്‍സ്റ്റിറ്റിയൂട്ട്  റിസര്‍ച്ച്  കൗണ്‍സിലിന്റെ അധ്യക്ഷനാണ്  60കാരനായ ഹാന്‍സന്‍. ഇപ്പോള്‍ 67 വയസ്സുള്ള റോബര്‍ട്ട് ഷില്ലര്‍ അമേരിക്കന്‍  റിയല്‍ എസ്‌റ്റേറ്റ് മേഖലയിലെ വിലനിര്‍ണയത്തിന്റെ ഏറ്റവും പ്രമുഖ മാനദണ്ഡങ്ങളിലെന്നായ കേസ്-ഷില്ലര്‍ ഇന്‍ഡക്‌സിന്റെ ഉപജ്ഞാതാക്കളിലൊരാളു മാണ്.