ലേഡീസ് ഒണ്‍ലി ബാങ്ക് വരുന്നു...! (BMB)

ഇന്ത്യയിലെ ആദ്യത്തെ സമ്പൂര്‍ണ വനിതാ ബാങ്ക് പ്രവര്‍ത്തന സജ്ജമാകുന്നു. കേന്ദ്ര സര്‍ക്കാര്‍ ആരംഭിക്കുന്ന സമ്പൂര്‍ണ വനിതാ ബാങ്ക് മുന്‍ പ്രധാനമന്ത്രി ഇന്ദിരാ ഗാന്ധിയുടെ ജന്മവാര്‍ഷികദിനമായ നവംബര്‍ 19ന് ഉദ്ഘാടനം ചെയ്യും. ഭാരതീയ മഹിളാ ബാങ്ക് എന്നാണ് ബാങ്കിന്റെ പേര്. 

മുംബൈയിലായിരിക്കും ഉദ്ഘാടനച്ചടങ്ങുകള്‍ നടക്കുക. കൊല്‍ക്കത്ത, ഗുവാഹത്തി, ചെന്നൈ, ബാംഗ്ലൂര്‍, ലക്‌നൗ, മൈസൂര്‍ എന്നിവിടങ്ങളിലാണ് ആദ്യ ഘട്ടത്തില്‍ ബാങ്ക് പ്രവര്‍ത്തനം തുടങ്ങുന്നത്. താമസിയാതെ ജയ്പൂര്‍ , ഇന്‍ഡോര്‍ ശാഖകളും തുറക്കും. 
ബാങ്കിന്റെ ചെയര്‍പേഴ്‌സണും മാനേജിങ് ഡയറക്ടറുമായി ഉഷാ അനന്തസുബ്രഹ്മണ്യത്തെ കേന്ദ്ര സര്‍ക്കാര്‍ നിയമിച്ചു. നിലവില്‍ രാജ്യത്തെ ഏറ്റവും വലിയ ദേശസാത്കൃത ബാങ്കായ പഞ്ചാബ് നാഷണല്‍ ബാങ്കിന്റെ എക്‌സിക്യൂട്ടീവ് ഡയറക്ടറാണ് അവര്‍ . 1982ല്‍ ബാങ്ക് ഓഫ് ബറോഡയില്‍ സ്‌പെഷ്യലിസ്റ്റ് ഓഫീസറായാണ്  ഔദ്യോഗിക ജീവിതം ആരംഭിച്ചത്.

ഉഷ അനന്തസുബ്രഹ്മണ്യന്‍

വിവരാവകാശരേഖ ഇനി ഓണ്‍ലൈനില്‍

വിവരാവകാശരേഖ ഇനി ഓണ്‍ലൈനില്‍. ഇതിനായി സര്‍ക്കാര്‍ ഓഫീസുകള്‍ കയറിയിറങ്ങുന്ന കാലം കഴിഞ്ഞു. സംസ്ഥാന ഐ.ടി.മിഷന്‍ പരീക്ഷണാടിസ്ഥാനത്തില്‍ ഒമ്പത് വകുപ്പുകളില്‍ ഒരുക്കിയ സൗകര്യം ഡിസംബറോടെ എല്ലാ വകുപ്പുകളിലേക്കും വ്യാപിപ്പിക്കും. ഇതിനൊപ്പം, വൈദ്യുതി, കുടിവെള്ള, ടെലിഫോണ്‍ ബില്ലുകള്‍, സര്‍വകലാശാലാ ഫീസുകള്‍ എന്നിവയും വീട്ടിലിരുന്ന് തന്നെ അടയ്ക്കാനുള്ള സൗകര്യം പ്രാബല്യത്തില്‍ വന്നുകഴിഞ്ഞു.

ഇതിനായി www.edistrict.kerala.gov.in എന്ന വെബ് പോര്‍ട്ടല്‍ ഐ.ടി.മിഷന്‍ തുടങ്ങിക്കഴിഞ്ഞു.  ഇന്‍റര്‍നെറ്റ് കണക്ഷനുണ്ടെങ്കില്‍ വീട്ടിലിരുന്നുതന്നെ സര്‍ക്കാര്‍ സേവനങ്ങള്‍ നേടാം. ഇതോടെ ഇ-ഡിസ്ട്രിക്ട് സേവനങ്ങള്‍ക്കായി അക്ഷയകേന്ദ്രങ്ങളില്‍ പോകേണ്ടതില്ലെന്ന സ്ഥിതിയായി. 66 ബാങ്കുകളുമായി ഐ.ടി.വകുപ്പ് കരാറില്‍ ഏര്‍പ്പെട്ടിട്ടുണ്ട്. ഈ ബാങ്കുകളില്‍ ഇന്‍റര്‍നെറ്റ് അക്കൗണ്ടുള്ളവര്‍ക്കോ ക്രെഡിറ്റ് കാര്‍ഡ് ഉള്ളവര്‍ക്കോ ഇ-ഡിസ്ട്രിക്ട് സേവനങ്ങള്‍ ലഭ്യമാക്കാം. നിലവില്‍ വിദ്യാഭ്യാസ വകുപ്പ്, വിവര സാങ്കേതിക വകുപ്പ്, ആരോഗ്യ വകുപ്പ്, നോര്‍ക്ക-റൂട്ട്‌സ്, തിരുവനന്തപുരം കളക്ടറേറ്റ്, ധനകാര്യവകുപ്പ്, മോട്ടോര്‍ വാഹന വകുപ്പ്, വ്യവസായ വകുപ്പ്, വനം വകുപ്പ് എന്നിവിടങ്ങളില്‍ നിന്നുള്ള വിവരാവകാശ രേഖകള്‍ ഇപ്പോള്‍ തന്നെ ഈ വെബ്‌പോര്‍ട്ടലിലൂടെ നേടാന്‍ കഴിയും. ഡിസംബറോടെ മുഴുവന്‍ വകുപ്പുകളിലും ഓണ്‍ലൈന്‍ വിവരാവകാശ സൗകര്യം ഒരുങ്ങുമെന്നാണ് അറിയുന്നത്. വൈകാതെ ഇ-ഡിസ്ട്രിക്ട് സേവനങ്ങള്‍ മൊബൈല്‍ ഫോണ്‍ വഴിയും ടച്ച് സ്‌ക്രീന്‍ വഴിയും ലഭ്യമാക്കുമെന്നും ഐ.ടി.മിഷന്‍ അറിയിച്ചു. 
ഇ-ഡിസ്ട്രിക്ട് പോര്‍ട്ടലിലേക്ക് ലോഗിന്‍ ചെയ്തുവേണം സേവനങ്ങള്‍ ലഭ്യമാക്കാന്‍. ഇതിനായി ആധാര്‍ നമ്പര്‍, ഇ-മെയില്‍ വിലാസമുള്‍പ്പെടെയുള്ള വിവരങ്ങള്‍ പോര്‍ട്ടലില്‍ രജിസ്റ്റര്‍ ചെയ്യണം. നിങ്ങള്‍ നല്‍കുന്ന വിവരങ്ങള്‍ ആധാര്‍ സേവനം നല്‍കുന്ന യു.ഐ.ഡി.യുമായി ഒത്തുനോക്കിയശേഷം ഉടന്‍തന്നെ ഇതുസംബന്ധിച്ച സന്ദേശം ലഭിക്കും. തുടര്‍ന്ന് യൂസര്‍ നാമവും പാസ്‌വേഡും ഉപയോഗിച്ച് ഇ-ഡിസ്ട്രിക്ട് സേവനങ്ങള്‍ ലഭ്യമാക്കാം.

ബഹിരാകാശത്തും ദീപശിഖാപ്രയാണം! (Torch Relay in Space)

അത്യന്താധുനിക കമ്പ്യൂട്ടര്‍ സാങ്കേതികവിദ്യകളും ബഹിരാകാശശാസ്ത്രവും കൈകോര്‍ത്തപ്പോള്‍ പുതിയൊരു ചരിത്രപ്പിറവിക്ക് അടുത്തയിടെ ലോകം സാക്ഷിയായി. ഒരു കായികമേളയുടെ ദീപശിഖാപ്രയാണം അനന്തശൂന്യമായ ബഹിരാകാശത്തുമെത്തിയതാണ് ശ്രദ്ധയാകര്‍ഷിച്ചത്.

റഷ്യയിലെ സോചിയില്‍ അരങ്ങേറുന്ന 2014 വിന്റര്‍ ഒളിംപിക്‌സിന്റെ ദീപശിഖയാണ് ചരിത്രത്തിലാദ്യമായി സ്‌പേസ് വാക്കിന്റെ ഭാഗമായത്. നവംബര്‍ ആദ്യവാരമാണ് ഒരു സോയൂസ് ബഹിരാകാശവാഹനത്തില്‍ ദീപശിഖ ഇന്റര്‍നാഷണല്‍ സ്‌പേസ് സ്‌റ്റേഷനിലെത്തിയത്. 166 ദിവസം സ്‌പേസ് സ്‌റ്റേഷനില്‍ ചിലവഴിച്ച റഷ്യക്കാരന്‍ കമാന്‍ഡര്‍  ഫയദോര്‍ യൂര്‍ചിക്കിന്‍, നാസയുടെ കാരന്‍ നൈബര്‍ഗ്, യൂറോപ്യന്‍ സ്‌പേസ് ഏജന്‍സിയുടെ ലൂക്കാ പാര്‍മിതാനോ എന്നിവര്‍ക്ക് തിരിച്ചുപോരാനായി പുതിയ ഒരു സംഘവുമായിട്ടായിരുന്നു ഈ വരവ്. റഷ്യന്‍ കോസ്‌മോനോട്ടുകളായ ഒലഗ് കോടോവും സെര്‍ജി റയസാന്‍സ്‌കിയും ചേര്‍ന്നാണ് ദീപശിഖ സ്‌പേസ് സ്‌റ്റേഷന് വെളിയിലെത്തിച്ചത്. ഒലഗ് ദീപശിഖയുമായി സ്‌പേസ് വാക്ക് നടത്തുകയും ചെയ്തു.

ദീപശിഖയുമായി സ്‌പേസില്‍

ചരിത്രത്തിലാദ്യമായാണ് ദീപശിഖയുമായൊരു സ്‌പേസ് വാക്ക്.  കമാന്‍ഡര്‍  ഫയദോര്‍ യൂര്‍ചിക്കിന്റെ സംഘം തിരികെ പോന്നപ്പോള്‍ അവര്‍ ദീപശിഖ ഭൂമിയിലെത്തിക്കുകയും ചെയ്തു. ഇതില്‍നിന്നായിരിക്കും വിന്റര്‍ ഒളിംപിക്‌സിന്റെ ദീപം തെളിയിക്കുക.

ഫയദോര്‍ യൂര്‍ചിക്കിന്‍ ദീപശിഖയുമായി തിരികെയെത്തിയപ്പോള്‍

വിന്റര്‍ ഒളിംപിക്‌സ് ദീപശിഖാപ്രയാണം ബഹിരാകാശത്ത് - വീഡിയോ കാണാം...