ഡച്ചുകാര്‍ക്ക് പുതിയ രാജാവ്!

യൂറോപ്യന്‍ ഭൂഖണ്ഡത്തിന്റെ വടക്ക് പടിഞ്ഞാറ് കിടക്കുന്ന ഒരു രാജ്യമാണ് നെതര്‍ലന്‍ഡ്‌സ് അഥവാ ഹോളണ്ട്. ഈ രാജ്യക്കാരെ ഡച്ചുകാര്‍ എന്നും വിളിക്കും. ഡച്ചുകാര്‍ക്ക് എന്താ പുതിയ വിശേഷം എന്നാണോ? അവര്‍ക്ക് ആറ്റുനോറ്റിരുന്ന് ഒരു രാജാവിനെ കിട്ടിയിരിക്കുന്നു, അതും 123 വര്‍ഷങ്ങള്‍ക്ക് ശേഷം!

 നെതര്‍ലന്‍ഡ്‌സില്‍ കുറേക്കാലമായി ഭരണത്തിന്റെ തലപ്പത്ത് രാജ്ഞിമാരായിരുന്നു. ഇപ്പോഴത്തെ രാജ്ഞി ബിയാട്രിക്‌സ് കഴിഞ്ഞ 33 വര്‍ഷങ്ങളിലായി അധികാരത്തിലുണ്ട്. അവരുടെ മകന്‍ വില്ലം അലക്‌സാണ്ടര്‍ ആണ് മാതാവ് പദവി ഒഴിഞ്ഞതിനേത്തുടര്‍ന്ന് ഇപ്പോള്‍ രാജാവിന്റെ സിംഹാസത്തിലെത്തി ചരിത്രം തിരുത്തിയിരിക്കുന്നത്. യൂറോപ്പിലെ ഏറ്റവും പ്രായം കുറഞ്ഞ രാജാവും ഇദ്ദേഹം തന്നെ. ഭാര്യ രാജകുമാരി മാക്‌സിമ അര്‍ജന്റീനക്കാരിയാണ്.

പുതിയ രാജാവ് വില്ലം അലക്‌സാണ്ടറിനെ മാതാവും സ്ഥാമൊഴിയുന്ന രാജ്ഞിയുമായ
ബിയാട്രിക്‌സ് അഭിനന്ദിക്കുന്നു. രാജകുമാരി മാക്‌സിമ സമീപം.

ഡച്ചുകാരുമായി നമുക്കും ചില ബന്ധങ്ങളുണ്ട്. 16-ാം നൂറ്റാണ്ടിന്റെ ഉത്തരാര്‍ധത്തിലാണ് ഡച്ചുകാര്‍ ഡച്ച് ഈസ്റ്റ് ഇന്ത്യ കമ്പനി സ്ഥാപിച്ച് നമ്മുടെ രാജ്യത്ത് ആധിപത്യത്തിന് ശ്രമം തുടങ്ങിയത്. 1741ല്‍ മാര്‍ത്താണ്ഡവര്‍മ്മ കുളച്ചല്‍ യുദ്ധത്തില്‍ ഡച്ചുകാരെ തകര്‍ത്തുവിട്ടു. അതോടെ അവര്‍ നമ്മുടെ നാട്ടില്‍നിന്നും കെട്ടുകെട്ടുകയും ചെയ്തു.

മുട്ടത്തുവര്‍ക്കിയുടെ 100-ാം ജന്മവാര്‍ഷികം

ജനപ്രിയസാഹിത്യകാരനായ മുട്ടത്തുവര്‍ക്കിയുടെ ജന്മശതാബ്‌ദി വര്‍ഷമാണ്‌ 2013.
അക്ഷരം കൂട്ടിവായിക്കാനറിയുന്നവരെയെല്ലാം നല്ലവായനക്കാരായി വളര്‍ത്തിയ എഴുത്തുകാരനാണ്‌ മുട്ടത്തുവര്‍ക്കി. `ഒരു കുടയും കുഞ്ഞുപെങ്ങളും' എന്ന കൃതിയിലൂടെ മലയാളത്തിലെ ഏറ്റവും മികച്ച ബാലസാഹിത്യകാരന്‍ എന്ന ഖ്യാതിയും അദ്ദേഹം സ്വന്തമാക്കി. എഴുതിയ 70 ഓളം നോവലുകളില്‍ പകുതിയും സിനിമയായി എന്ന റെക്കോര്‍ഡും മുട്ടത്തുവര്‍ക്കിക്ക്‌ സ്വന്തം.
ചങ്ങനാശ്ശേരിയിലെ മുട്ടത്തുകുടുംബത്തില്‍ മത്തായി-അന്നമ്മ ദമ്പതികളുടെ ഒന്‍പതു മക്കളില്‍ നാലാമനായി 1913 ഏപ്രില്‍ 18നു ജനിച്ചു. കഷ്‌ടപ്പാടുകള്‍ നിറഞ്ഞതായിരുന്നു വര്‍ക്കിയുടെ ബാല്യകാലം. ചങ്ങനാശ്ശേരിയില്‍ത്തന്നെയായിരുന്നു വിദ്യാഭ്യാസം. തടിഫാക്‌ടറിയിലെ കണക്കെഴുത്തുകാരന്‍, അധ്യാപകന്‍, ദീപിക പത്രാധിപസമിതി അംഗം എന്നീ നിലകളിലെല്ലാം ജോലി ചെയ്‌തു. 1989 മെയ്‌ 28ന്‌ അന്തരിച്ചു. പ്രധാന നോവലുകള്‍: ആഴകുള്ള സെലീന, ഇണപ്രാവുകള്‍, കരകാണാക്കടല്‍, ചട്ടമ്പിക്കവല, പച്ചനോട്ടുകള്‍, പാടാത്ത പൈങ്കിളി, പൂന്തേനരുവി, പ്രിയമുള്ള സോഫിയ, വെളുത്ത കത്രീന പ്രധാന നാടകങ്ങള്‍: ഞങ്ങള്‍ വരുന്നു, വിളക്കും കൊടുങ്കാറ്റും, ഒട്ടകവും സൂചിക്കുഴലും, കൂട്ടുകിണര്‍, പുതിയ മണ്ണ്‌, മാറ്റൊലി, സമരഭൂമി, വലിയ മുക്കുവന്‍, ഫാദര്‍ ഡാമിയന്‍. ചെറുകഥാ സമാഹാരങ്ങള്‍: അടയാളങ്ങള്‍, അവസാ നിക്കാത്ത രാത്രി, ഇരുളും വെളിച്ചവും, കല്യാണരാത്രി, നെയ്യാമ്പലുകള്‍, മണിയറ, പളുങ്കുപാത്രങ്ങള്‍, പൊട്ടാത്ത നൂലൂകള്‍, തെരഞ്ഞെടുത്ത കഥകള്‍. ഖണ്‌ഡകാവ്യം: ആത്‌മാഞ്‌ജലി. നര്‍മ്മപംക്‌തി: നേരും നേരംപോക്കും. വിവര്‍ത്തനങ്ങള്‍ : അക്‌ബര്‍, ഡോക്‌ടര്‍ ഷിപാഗോ, അണുയുഗം പിറന്നു, അണ്ടര്‍ഗ്രൗണ്ട്‌, കുരിശും കൊടുങ്കാറ്റും, താഴ്‌വരയിലെ വീട്‌, കൊടുങ്കാറ്റിലൂടെ, പടിഞ്ഞാറന്‍ കഥകള്‍, മായാത്ത കാല്‍പാടുകള്‍. തിരക്കഥ : മുളംപാലം. 

എസ്‌.കെ. പൊറ്റെക്കാടിന്റെ 100-ാം ജന്മവാര്‍ഷികം

കോഴിക്കോട്‌ പുതിയറയിലെ പൊറ്റെക്കാട്ടുവീട്ടില്‍ 1913 മാര്‍ച്ച്‌ 14-ാം തീയതിയാണ്‌ ശങ്കരന്‍കുട്ടി എന്ന എസ്‌.കെ. പൊറ്റെക്കാട്‌ ജനിച്ചത്‌. കുഞ്ഞിരാമന്‍ മാസ്‌റ്ററുടെയും കുട്ടൂലി അമ്മയുടെയും മകനായി. തീര്‍ത്ഥാടന യാത്രാവിവരണം മാത്രമായി ഒതുങ്ങിക്കൂടിയ മലയാള സഞ്ചാരസാഹിത്യശാഖയെ പൊറ്റെക്കാട്‌ മോചിപ്പിച്ച്‌ സ്വതന്ത്ര സാഹിത്യശാഖയാക്കി. 1938 മുതല്‍ അദ്ദേഹം യാത്രാവിവരണമെഴുതിത്തുടങ്ങി. 1949 ലായിരുന്നു ആദ്യ വിദേശയാത്ര. പ്രധാന യാത്രാവിവരണങ്ങള്‍: ബാലിദ്വീപ്‌, കാപ്പിരികളുടെ നാട്ടില്‍, കാശ്‌മീര്‍, പാതിരാസൂര്യന്റെ നാട്ടില്‍, ഇന്നത്തെ യൂറോപ്പ്‌, സിംഹഭൂമി (രണ്ടുഭാഗം), ബൊഹീമിയന്‍ ചിത്രങ്ങള്‍, മലയാനാടുകളില്‍, നൈല്‍ ഡയറി, സോവിയറ്റ്‌ ഡയറി, ഇന്‍ഡോനേഷ്യന്‍ ഡയറി, ക്ലിയോപാട്രയുടെ നാട്ടില്‍, കെയ്‌റോ കത്തുകള്‍, ലണ്ടന്‍ നോട്ട്‌ബുക്ക്‌. 1939 ല്‍ കേരള കൗമുദിയിലാണ്‌ പൊറ്റെക്കാടിന്റെ ആദ്യനോവല്‍ നാടന്‍പ്രേമം ഖണ്‌ഡശ്ശ അച്ചടിച്ചുവരുന്നത്‌. പ്രധാന നോവലുകള്‍ : മൂടുപടം, വിഷകന്യക, പ്രേമശിക്ഷ, ഒരു തെരുവിന്റെ കഥ, ഒരു ദേശത്തിന്റെ കഥ. പ്രധാന ചെറുകഥകള്‍ :രാജമല്ലി, പുള്ളിമാന്‍, നിശാഗന്‌ധി, മേഘമാല, പത്‌മ രാഗം, ഇന്ദ്രനീലം, പ്രേതഭൂമി, രംഗമണ്‌ഡപം, യവനികയ്‌ക്കു പിന്നില്‍, ഹിമവാഹിനി, വനകൗമുദി, ചന്ദ്രകാന്തം, കനകാംബരം, അന്തര്‍വാഹിനി, ഏഴിലംപാല, കാട്ടുചെമ്പകം. പ്രേമശില്‌പി, സഞ്ചാരിയുടെ ഗീതങ്ങള്‍ എന്നീ കവിതാസമാഹാരങ്ങളും അദ്ദേഹത്തിന്റേതായുണ്ട്‌. 1962 ല്‍ പാര്‍ലമെന്റംഗമായി. 1982 ആഗസ്‌റ്റ്‌ 6ന്‌ അന്തരിച്ചു.